الاستخدام الصحيح لك نوع من المسكنات تبعا لنوع الالم

سلام لزوار المدونة

اليوم وعقب ماخلصت الامتحانات وريحت حبيت اوضح لزوار هالمدونه اشياء تعلمتها من دراستي والفرة بالمستوصفات والمستشفيات والصيدليات الخاصة وحصيلة يقولون لازم نحتفظ فيها لأنها سر من اسرار المهنه بس الصراحة وايد اخطاء اشوفها لاستخدام هذي الانواع المختلفة من المسكنات

بس قبل لا ابدي بالكلام عن هالانواع راح اقول المكتوب مو حق إلي اعمارهم اقل من 18 او عندهم اي مرض ثاني او الحوامل

فاليوم قررت اني اوضح ولو بشكل بسيط عن انواع المسكنات الي تنوصف من الاطباء لنا او نشتريها من الصيدلية على حسب نوع العوار

صج الموضوع موضوع تخصص بس راح احاول ابسطه كثر ما اقدر وافيدكم واكون منعت اكثر الاخطاء الي تصير باخذ هالمسكنات

راح ابدي بالبندول

هذا مسكن مايخلى منه بيت والكل عالصاعدة والنازلة بندول

عوار راس بندول اسنان بندول حرارة بندول صج في ناس ينفعهم بس مو العلاج لكل شي

البندول عبارة عن مادة اسمها

paracetamol or acetaminophen

وهالمادة نفسها بالبندول والادول والتينانول والبنادركس

panadol, Adol, tylenol, panadrex

يعني اي منتج من هذيلي له نفس المفعول لأنهم نفس التكوين بس باسماء تجارية مختلفة و احسنهم بالخبرة وسؤال المستخدمين هو كالتالي

tylenol, panadrex, adol , panadol

لأسف البندول ترتيبه الاخير والكل يحب يستخدمه معنه اقل تاثير بس ما افتي واقولكم السبب بس الارجح المواد الغير فعالة الي تمسك هالمكونات مع بعض بالندول تاثر على مفعوله

والجرعة الامنه لأي واحد منهم 6 حبات باليوم

صحيح الجرعة يمكن تلقونها بالعلبة 8 حبات باليوم بس 8 وايد وتاثر على الكبد وكافي 6 للألم المستمر

وتنبيه وايد ما ينتبهون عليه لما يستخدمون احد هالمنتجات وياخذون ادويه للنشله مثل

fludrex or panadol flu

الجرعة من هالادويه فيها مادة الاسيتومينوفين او البراسيتامول فعشان الامان منه اقروا المكونات لأي دوا مسكن لآن يمكن تتعدون الجرعة اليومية لهالدوا يعني اكثر من 8 حبات باليوم وهذا خطر على الكبد والكلى وهالجرعة عباره عن 4 جرام او اكثر

واعيد الجرعة الامنه للبندول 6 حبات باليوم يعني خلال 24 ساعة بس 3جرام واذا كان في الم ما خف او راح انصحكم غيروا المنتج لمنتجات ثانية لها مفعول احسن وتكون آمن

والتنبيه الثاني حذار من اسخدام البندول مع اي نوع من الكحول

يمكن اغلبنا مسلمين وما نشرب الكحول بس في ادوية مثل ادوية الكحة وغيرها فيها نسبة كحول واستخدامها مع البندول يسبب التهاب وضمور بالكبد فلا تاخذون ادويه فيها كحول وتستخدمون البندول او اي اسم تجاري ثاني

والحين راح اتكلم عن المنتجات سريعة المفعول لتخفيف الألم لفترة ما تزيد عن 5 أيام مثل آلام الاسنان والمفاصل والاصابات بالذات اصابات الملاعب

وسريعة يعني مفعولها يبين من 15 الى 30 دقيقة

المنجات اهي

Cataflam 50 mg or diclofast as potasium salt, olfen 25 mg or 50 mg or clofen as sodium salt

وهذيلي نفس الشي كمادة فعالة اسمها

diclofenac

بس الاختلاف انه يكون ملح صوديوم او بوتاسيوم فيختلف مفعوله والاسرع ملح البوتاسيوم بالنسبة لهالأدوية واقصي جرعة باليوم اهي mg200

ومرضى الضغط والقرحة والربو يديرون بالهم منهم لأن ممكن يتعبهم وياثر عليهم بالأنواع الي ذكرته او راح اذكرهم

وفي عندنا البروفين

brufen 200 mg or 400 mg or 600 mg, Mortin 200 mg, Avil 2oo mg, ibutab 2oo mg, profinal 200mg or 400mg or 600 mg, I-Profen 200 mg or 400 mg 0r 600 mg.

وكل هالادوية عبارة عن مادة اسمها

ibuprofen

واستخدام اي اسم تجاري منهم له نفس المفعول والجرعة الامنه لهل المادة

1200 mg

مقسمة عاليوم وهذا الدوا كمسكن ألم يعتبر الاخف تاثيرا على المعدة وتسبب للقرحة بس ما ينصح للي عنده قرحة ياخذة لأن في منتجات موجودة لهم بس الي يخاف من القرحة هذا الدوا امن بجرعة اقل من 1200 ملجرام باليوم

اليوم الثاني من الكتابة :)

امس كتبت الجزء الاول بس ماحبيت احط البوست على فترات وقلت اخليه بوست كامل عشان تكمل الفايدة منه

المهم الحين نوصل حق المنتج الي اسمه

feldene 10 mg or 20 mg as capsules or 10 mg as tablet

هذا اكثر استخدام له بدون وصفه لآلام الاسنان والمادة الفعالة فيه اسمها

piroxicam

والجرعة اليومية له 30 الى 40 ملجرام باليوم على حسب شدة الالم

والغريب فيه ان الجرعة ان كان 10 او 20 او 30 اذا نوخذت مرة وحدة باليوم ماتاثر عى القرحة او تاذي المعدة بس اذا تقسمت على اليوم يمكن تهيج القرحة او تسببها ونفس الكلام ينطبق على منتج اسمه

mobic 7.5 mg or 15 mg

وهذا مادة الفعالة اسمها

meloxicam

واقصى حد للجرعة اهو 15 مليجرام باليوم وعشان تفادي الأثر على المعدة الجرعة تنوخذ دفعة وحدة مرة وحدة باليوم

وعقب ما خلصت الادوية الي اعرفها لعلاج الألم الحاد لمدة ماتزيد عن 5 ايام انقلكم للمسكنات الي تستخدم للألم المزمن مثل آلام المفاصل والخشونة وغيرها وهذي الالام تحتاج شهور لعلاجها وعادة المسكنات تكون تحت اشراف طبيب ويكون كاتبها للمريض بس مافي مشاكل من اني اذكرهم على السريع

اولها

voltaren 25 mg, 50 mg or LA or SR

هذا نفس

olfen 25 mg or 50 mg or clofen as sodium salt

عبارة عن diclofenac sodium

ومثل ماذكرت من قبل ملح الصوديوم لهالمادة الفعالة تستخدم لعلاج الآلام لفترات طويله وتاثيرها ياخذ فترة على مايبين يعني اكثر من نص ساعة

وبعدها احول على الادوية الي لها خاصة انتقائية بالتأثير على نوع الألم من غير ما تأثير على سيولة الدم او تسبب بالقرحة

اليوم الثالث من الكتابة ومازلت مصرة اني اكمله واسويله بوست :):)

المهم وصلنا حق الأدوية ذوات الخواص الانتقائية

selective COX-2 inhibitor

ترى ترجمتى لها مو ترجمه علمية بس على قدي لأني وايد اخورها بالعربي عشان جذي اكتبهم بالانجليزي للأمانه العلمية :):):)

المهم هالامثلة تضمن

celebrex 100 mg or 200 mg capsules and Arcoxia 70mg or 90mg or 120mg

هذيلي كنصيحة لوجه الله ما انصح احد يروح يشتريهم بكيفه صج الصيدلاني راح يبيعهم بدون اي مشاكل بس لأنهم ادوية يديدة بالسوق وحد الحين الدراسات عليهم ماخلصت والي يبي يستخدمهم فيكون عن طريق طبيب بعد ماسوى التحاليل وتطمن ان استخدامهم امن

وعقب هذيلي احول للألم المصاحب لنزيف مثل عوار الأسنان بعد عملية جراحية او الآلام النسائية

في منتجين

ponestan (mefenamic acid) 250 mg capsules or 500 mg tablet

طريقة اخذة باول جرعة 500 مليجرام وبعدها 250 مليجرام لمدة ما تزيد عن اسبوع

والمنتج الأخير

fastum (ketoprofen) 100 mg tablet or extended release

والحد الاقصى للاستخدام اليومي له 300 مليجرام

وعقب هالشرح اخص مرضى الربو ببعض المنتجات لتخفيف آلام اصابات الملاعب والشد العضلي

صج ما تكلمت عن الشد العضلي من قبل بس حبيت اذكره مع مرضى الربو للإفادة لأنهم مساكين وايد يعانون واكثر الادوية الي ذكرتها تتعبهم وما يقدرون يستخدمونها وهذي اسماء الادوية وطريقة استخدامها عشان لا تأثر عليهم طبعا هالطريقة تنفع الي ماعنده ربو بعد

اذا كانت الاصابة فيها ورم وانتفاخ فاحسن شي

Reparil tablets or gel

طبعا الجل موضعي والحبوب للتأُير الداخلي

وللعوار

feldene 10 mg

ياخذ المصاب حبة وحدة باليوم كجرعة اولى اذا لا قدر الله وتعب منه لا يكمل بس اذا ما صار معاه اي عوارض جانبية اليوم الي بعدة ياخذ الجرعة العادية 10 مليجرام بس اذا ما خففت عليه الألم يزيدها لحبتين ياخذهم مع بعض مرة وحدة باليوم

اما للشد العضلي فاحسن شي ما اثبت تعارضه مع الربو

sirdalud 2 mg or 4 mg tablets

واقصى جرعة باليوم عبارة عن 36 مليجرام باليوم

وبالنهاية اذا شفتوا اي خطأ او انا نسيت منتج او اسم ماذكرته او شي غفلت عنه فراح اخلي باب التعليق مفتوح وسامحوني عالقصور واذا تكلمت اكثر من اللزوم بس كل الي حبيت اقدمة نصيحة عامة لسلامتكم وسلامة الي يعزون عليكم

وان شاء الله ما تحتاجون هالكلام والله يديم عليكم الصحة والعافية